أنا راجع تاني لميداني

1
أنا راجع تاني لميدانـــي
أنا عارف فينُه عنوانــي
عنواني كتبته يا شهيــــد
ينّور دربه إيمانــــــــــي
2
أنا راجع تاني وهْتافـــــي
يرسمها ملامحي وأوصافي
أنا عايز حرّية بجـــــــــــدْ
والعدل دا دوايا الشافـــــي
3
أنا راجع تاني وبقــــول :
متفتّح لو كنت فــــــلول
العيش العدل الحريــــة
أنساها دا مش معقــــول
4
أنا راجع تاني دا أكيــــــــد
ف ميداني هنقول ونعيـــــد
ارحل يعني يا ظالم إمشي
مش راح نرجع تاني عبيد
5
أنا راجع تاني وبقولْــــها
عشان يفهموا كل فلولْها
عمر الثورة ما هتتهـــــــد
والظالم عمره ما هينولها
6
أنا راجع تاني وبنـــــــــادي :
يا كل أحرار ف بـــــــــلادي
 إيدي ف إيدكم ماتسيبوهاش
دا جهادكم دا هوّ جهـــــادي
7
أنا راجع تاني يانــــــــاس
أشعلها شمعة إحســــــاس
بالثورة وكل الثـــــــــوار
يتدارى وسواس خناس
8
أنا راجع تاني بعزيمــــه
وهعيشها أيامي كريمــــه
يتحقق حلمك ياشهيـــــــد
نهزم تاني كل هزيمـــــه
......................
صالح شرف الدين
إبريل 2012م

منتديات أسطورة العرب تسرق موضوعي

الحمد لله

تنبيه هام

كثر النقل من المدونة دون أمانة في النقل 

نحن نتابع أعمالنا على شبكة المعلومات بصفة دورية 

وقبل أن ننشر في المدونة أو المنتديات نسجل التاريخ في الشهر

العقاري لنحتفظ بحقنا القانوني ..لذلك نود أن يكتب كل من ينقل 

أي نص يكتب منقول أو مما راق لي إذا لم يذكر المصدر حتى 

لا نتحول من مؤلفين وكتاب وصحفيين نتحول إلى سارقين 

لذا وجب التنبيه