شعب مصر شعب واحد

مصر حته منك وحته مني

شعب مصر شعب واحد -4

................

11

بين الشعب وبين الشعب

لما تقوم وتحمى الحرب

المهزوم هيروح فين ..

المهزوم منا ملايين ..!

نسحب منهم الجنسية

زي الإمارات العربية ..!

الجنسيه هناك معناها

وظيفه ..فلوس.. عيشه مرتاحه

اما الجنسيه المصريه

أعظم جنسيه اسمية

اسألوا عنها بكل صراحه

هتجاوب حاحه النطاحه ...!

الأجنبي عندنا متصان

وابن بلدنا هنا متهان ..!

مين مسئول ..مين مسئوله ..؟؟

إمتى كل مصري ف بلده

يبقى مواطن درجه أولى ..؟؟

.........................

12

واللي يفكر يطرد أهله

لازم مخّه نعالجه بجد ..!

دا البيت الواحد ف بلدنا

لوحه من كل الألوان ..!

الأب ليبرالي ونافش ريش الحريه في وشوشنا

والأم ويا الإنقاد شايفاهم أحسن لبلدنا

والابن علماني وكافر وبكل القيم الوطنيه

والبنت منقبه سلفيه ...!

مع كل الخلافات المره

تجمعهم دايما طبليه

تجمعهم دايما مصريه ..!

................................

13

لو حقيقي عايز حق

لو صحيح عاشق مصر

إيدك قوم حطّها ف إيديَّ

نبني فيها ألف قصر

خيرها ليك خيرها ليَّ..!

اتحادنا أغلى نصر

على كل البلطجيه ...!

اللي جوه واللي برّه

همّ شرّ وعنصريّه..!

همّ مافيا جوانيّه

همّ مافيا إقليميّه

همّ مافيا عالميّه ..!

كلهم عايزنا نبقى

شعب متفرّق كسول

شعب متسرطن جهول...!

يهزموا فينا الأصول

والأصول هيّ مصر ..!

حتّه منّي ،وحتّه منّك

تنطِفي شموعي نزول

لما تبعد مرّه عنّي

لما أبعد مرّه عنّك

.................

صالح شرف الدين

 يونيو 2013م

شعب مصر شعب واحد -3

.......................

8

كنت فين لما خدوني

من غير تهمه وعذبوني ..؟؟     

عددوا صنوف العذاب

جسمي تنهش فيه كلاب

 ف كل حته جرح ناب ..!

كنت فين ..فين الحساب ..؟؟

اللي جفف في المنابع

واللي قفّل في المصانع

واللي عذب ع الهويه

إنت فاهم القضية ..!

يدبحونا أمر عادي

دبح عابر للسنين

قصده بس المسلمين

قرطبه أو دير ياسين ..!

إنت فين ..إنت مين ..؟؟

إنت عاقل ليك عنين ..؟

إنت سامع الأنين ..؟؟

ليه سكت من سنين على ظلم المظلومين..؟؟

ليه تلخبط ف القضيه ..؟؟

ليه توقف ضد الضحيه ...؟؟

ليه سابوك من غير عذاب ..؟؟

كنت صاحب للكلاب ..؟؟

.................

9

واللي بيقتل من غير ذنب

ليه موقفتش مره ف وشه ..!

اللي بيقتل بالطياره

واللي بيقتل جوه مغاره

صوتك ليه ميهزش عرشه..؟؟

 علشاني جيشتوا جيوش

للظالم وردكوا مفروش ..!

تعملوا زيّه ..تقسموا مصر

حبه شمال وحبه يمين

دول حلوين ودول ضالين

ع الظالم دايما ساكتين ..!

........................

10

واللي بيسأل يبقى أنا مين ..؟

أنا طرح عذاب الزنازين

فيها قبور الإنسانيه

فيها أسوأ عبوديه.!

والكل عن حقي ناموا

وأنا جوه جوانتيناموا ..!

ظلم وقهر وخط نار

قتل من غير أي تار ..!

إحنا صفر على الشمال

إنت  فاروانا فار..!

لما أصرخ هاتوا حقي

لما أصرخ م العذاب

تبقى تهمتي الإرهاب ..!

لما أحب الحق أنادي ..

يبقى دا أكبر ذنوبي

لو فهمت النص عكسي

راح أقول يا نفسي توبي...!

لو بتفهم ف الحقوق

لو بتعرف واجبات

لازم الظالم يدوق

اللي دقته من سكات..!

................

شعب مصر شعب واحد

مصر هيّ الأصول