شعب مصر شعب واحد-2
...........................
4
أنا مصري وانت مصري
شعب واحد من سنين ..
مصر فينا قلب عين ...!
ليه تجرّح مجروحين ..؟
دي عجيبه م العجايب
مصري بيفرّق ف ناسه
مصري راكب بس راسه ...!
لما اضل أركب دماغي ..
قوللي : إن العقل زينه ..
إوعى تلوي يوم دراعي ..
تفتكر إنك نبينا !
تحتكر ليك الحقيقة ..
تعتبر إني عدوك
وان أفكارك بريئة ..!
................
5
شعب مصر شعب واحد
رب مصر رب واحد
حتى لو عبدوا التلاتة ...!
الحساب يوم الحساب
والحكم رب الكتاب..!
أنا مصري ابن مصري
مصر تجري في عروقي ..!
أنا بحكم نفسي حصري
ليه بتاكلوا في حقوقي ..؟
حتى مينا قام يوحّد ..
وانتو ليه بتقسمونا ...؟
........................
6
واللي يطعن في الشريعة
واللي قال هن السبايا
في ضلاله هو تايه
هوّ مش فاهم أكيد
ديني بيحرر عبيد
لما يذنب الرجال
لما تذنب الولايا
ربّ سوى في العقاب
كلنا مخلوق لدور
لما بنقول القوامه
للرجال مش للذكور
للنسا كل الحقوق
ثابته في أم الكتاب
أمهاتنا مش سبايا
ربّ قسّم النصاب
.................
7
روحي شايلها فوق الكف
إما النصر وإما شهادة
لما أغلط والنية صافيه
أطلب من ربّ الغفران
ولما أصيب لي أجران
كل الناس عندي سيان
عمري ما افتش جوه النيه
رب الأعلم بالنيات
واللي عايز يبقى معايا
بيثور دايما ع الطغيان
والمدعي دايما بيبان
والصادق هوّ الإنسان
يجمع شعب يوحّد أمّه
يمحي الظلم يزيح الغمة
عمره ما فرّق بين الناس
علشان جنس شكل ولون
عمره ما يرضى الدين ينداس
عمره ما سب ف أديان حد
عارف إن دينه أساس ...!
.......................
يتبع
.................
صالح شرف الدين
يونيو 2013م
ليست هناك تعليقات:
إرسال تعليق