من دفتر أحلام الثورة

من دفتر أحلام الثورة

..............................
إلى المتطلعين لنسائم الحرية والعدالة الإجتماعية والروح الإنسانية ...
إلى شهداء ثورة الشباب المستمرة في الذكرى الأولى لبداية
الثورة التي احتفى بها العالم الحر ؛لقدرتهم على الحشد
،وتضحياتهم المستمرة ،وانحيازهم للحق ..
.............................
حلّوا عنّا يا لواءاتْ
كام عصفور ف إديكم ماتْ!؟
1
إحنا نعيش ف جحور وقْبورْ
وانتم تبنوا أعلى قصور
مش عايزيين دبابير ونْسورْ
كل ظالم يمشي يغورْ
خافوا المصري لما يثورْ
مشْ هنرْضى تاني بفتاتْ
حلّوا عنّا يا لواءاتْ
2
حلّوا عنا كفايه ..كفايهْ
قهر وظلم وَلِي وولايهْ
مين إدّالْكوا علينا وصايهْ
من غير عهد ومن غير رايه
قتلْتوا الأم قتلتوا الدّاية
قتلتوا ولاد عرّيتوا بنات
حلّوا عنا يا لواءات
3
قتلْ وسحْلْ أسياد وعبيدْ
كلْ يوم ْ الظلم ْيزيدْ
وِحْنا نعاند كل عنيدْ
ولا بنْخاف م التّهديد
ولا هنْضيّع حق شهيدْ
والملايين أبطال روياتْ
حلّوا عنّا يا لوءات

4
عايزين مصر تروح على فينْ؟
كل شجرها :حزينه وحزينْ
ماشيه ف ضلمه من غير عينْ
وانتوا ظلمتوا بنات وبنين ْ
من غير مّله ومن غير دينْ
مش راح تحميكم قواتْ
حلوا عنا يا لواءاتْ
5
سرطان ماشي ف دم ولادنا
سم بيهْري في أكبادْنا
حبستوا جرسنا ويّا المدنه
مع إجرامكوا نقضنا الهدنه
ولْميادين الثوره عدْنا
نحمى بلدنا من الخيانات
حلّوا عنّا يا لواءات
6
مصر كبيره كبيره بجد ْ
وثورة مصر من غير حدْ
بطول النيل وقوة سدْ
وحنا معاكو لا صوت ولا رد
بقينا وبور كينا فاسو خوات
حلّوا عنا يا لواءات
......................
صالح شرف الدين
28 يناير 2012م