مصر ياظالمة

إحنا مصر..وياما مر عليها وعلينا ..بنحبها ..ولا يمكن
يقدر يكرّهنا فيها حد..نغضب منها ..زي ما بنغضب
من روحنا..وروحنا فدا تراب أرضها
..نفسنا يبقى مافيش حد زيها.
*************
1
مصر يا ظالمة لنفسك
اصْحي فوقي اسمعي
مني الرساله.
امْتى كان المصري ابنك
كان بياكُل م الزبالهْ!؟
امتى أنكر يوم جِميلك
كان بيفخر بالندالهْ!؟
امتى هُنت يوم عَليهْ!؟
امتى غَمّس بالعمالهْ!؟
أمتى عطّل يوم إديهْ!؟
امتى عاش عليك عالهْ!؟
***************
2
مصر يا ظالمة لنفسك
اصحي فوقي افهمي
مني الرساله
امتى كان المصري ابنك
كان بيكره وشْ أمّهْ!؟
كان بيحلم إنه يهرب
يرمي نفسه ف بحر همّهْ
يلقى نفسه ف حضن حيّهْ
يعشق الفاجر وسِمّهْ
امتى كان المصري يكره
شكل خاله وشكل عمّهْ!؟
*********************
3
مصر يا ظالمة لنفسك
اصْحي فوقي اسمعي
لِيه الرساله
لمّا خاب يوم الرهانْ
واستَأْسدت فينا الفيرانْ
لمّاغاب نجم الكرامه
والجهل فتّح لُهْ بِيبانْ
وعلى كتافك بيمرحْ
ميكيافيللي أُلعبان
وانت نايمه ف العسل
والعسل غطّى الودان
******************
4
مصر يا ظالمة لنفسك
اصحي فوقي ردي
على حروف الرساله
ليه الجاهل فيك اتنصفْ
سبتيه ليه يمسك الدّفّه
ويلف بيك و بالجهالة
يلف بيك مِيتْ لفّه
صاحب الوهم الكبير
مَلا لِكْ م الوهم قُفّهْ
قام كل نُصْ واتحكّمْ
ومعاه كل صاحب هفّه
********************
5
مصر يا ظالمة لنفسك
اصحي فوقي نفذي
حروف الرساله
قومي اكتبي سطر النهاية
شدي ع الكل الستارهْ
بالنيله ارسمي بكره
نضفي حتى الحجارة
انفضي م الذل ايدكْ
ارفعي اسمك منارهْ
اغسلي شعرك وشعبكْ
نوري درب الطهارهْ
********************
صالح شرف الدين
أغسطس2010م
***************